Flinstones hebbe neeje hieërser: Prins Tom II 

 Op zaoterdág 13 jannewarie is Tom Direks (36) uutgeroēpe tot neeje Prins van Aostrum, Lull en d’n Boshuuze. Adjudante Nick Gommans (35) en Chris Wilschut (34) en Nar Steef Gielens (34) stòn án zien ziej ien dit korte, már kráchteg seizoen.  

Vanzelfspraekend wier d’n aovend gestart mit ut aftreeje van Jubeleejumpreens Bob en zien kwartet. Bob hiēld zich hierbeej án zien belofte die heej zien kámmeräöj haaj gedaon tiejes de zitting: namelek én kort slotwoord. 
Bob, Bo, Max en Bas wiere ontdaon van alle medállies, schuutjes, klingels en steeke um vervolges de Âld Aostrumse Preense (AAP) te zien starte. De zaal wier getraktieërd op én bieësteg iendrukwekend bòksgala mit groeëtheden van aover de gâns waereld. 

Bob kende de zwákke plekskes van zien tegestânders, wòrdur zeej genne kâns hàn tigge um te winne. Hoewel ut d’r gröts en iemposant uutzaag, leek ut Bob genne energie te hebbe gekaost. Went ut afsluutende AAPe-lied wier dur um grandioos gebròcht en gezonge. 

Nie veul látter wier d’r archeologisch ònderzuuk verricht op de buun. Twieë top-archeologe mòsse kort nao ánkomst hun verwaachtinge beejstelle, umdat de lokasie wor zeej ware toch nie Aostrum bleek te zien. Gelukkig ware zeej dur hun kennis en ervaring goēd op de häögte aover de Flinstones, of Prinsstones, en zoeë nome zeej de zaal án de hând ien ut verhaal. 

De ánwezige vermákte zich bieëstig mit alles wat vurbeej kwaam. Dit ien taegestelling tot de Flinstones án ut aend van ut stuk. Hunne tiedreis liēp behuurlek uut de hând. De reis ging van toen nor now, vervolges nor 2015 en 1987, wor urst Prins Clemens I en daornao Prins Bert I wiere geprissentieërd. Ien elk jaor wier snel duudelek dat dit nie de jaortalle ware wor de Flinstoines naor toe wòn reize, már de tiedreisapplicatie op hunne smartstone bleek nie goed te waerke. De reis eindigde dordur onbedoeld ien 2024. Vur ut gezelschap ien urste ienstasie nie ut gewaenste aend, már toen zeej zage dat Prins Tom ás neeje Preens van Aostrum tevurschien kwaam ware zeej bliej um beej dit spektakel ánwezig te kunne zien. 

Preens Tom, dén ut maest was genoemd ien de Preensepoll, wier mit zien Adjes en Nar geienstállieërd, waornao én manjefiek openingswoord volgde van de neeje Preens. 

En toen was ut langverwaachte moment aendelek dór, ut kwartet vuugde zich mit hun mégjes beej de meense ien de zaal. Ze wiere dor volop gefillesetieërd en d’r wier bieësteg gedânst op de klânke van Naachtwaerk, wordur ut enne TOP-aovend wier ien d’n Oesterham.  

Prins Tom wònt mit zien vriendin Maud en daochter Nine op de Stationsweg en is ien ut dageleks laeve vráchtwagesjefeur beej Kempen Transport. Mit Adjudante Nick en Chris en Nar Steef göt dit Kwartet d’r hieël zeker vur zörge dat dit én onvergaetelek seizoen wert. Prins Tom II sloot ziene speech af mit zien leus: “Vier vastelaovend en vier ut laeve, um mekaar mojje herinneringe te gaeve!”