*Uitslag*OPTOCHT*2023*
| Categorie A kinderen | |
| 1 | De Duvelkes |
| 2 | Wij zijn tuig |
| 3 | Schoolkwarteit |
Categorie B kleine groepen |
|
| 1 | Boddy Peen(t) |
| 2 | Weej zien Nathan |
Categorie D grote groepen |
|
| 1 | Wij zetten de tent op de kop |
| 2 | Prinses Anne |
| 3 | Drek Queens |
| 4 | Mit 6x11 Fladdere weej uut d'n Dojje Hoek |
Categorie E eenlingen |
|
| 1 | Hazes |
Categorie Zet um opper pries |
|
| 1 | De Duvelkes |
Bedaankt dat gillie wer allemòl het mit gedoan an ozze prachtige optocht!!
Hopelijk zien we ollie kommend jaor wer verbeej kòmme!!
Toespraak Vorst Bart
Zondag 19-02 was in de Oostrumse kerk de traditionele carnavalsmis met mooie woorden van Vorst Bart.
Goejemaerge Karklingels en Karklingelinnekes,
Ik zeuj gaer wille beginne mit ut ovverdrage van mien koomplemente an de kemissie kaerk. Ten urste hebbe zeej en biezoonder mojje mis ienén gezet, waor ge dalek de rest van göt zien en huure.
En ten twedde umdat zeej ut thema: Laote Viēre perfect hebbe áfgestemd òp òs 6x11 jubileumjaor.
Eind jannewarie hebbe weej en schitterend jubileumweekend geviērd wor weej ien òs belaeving vur hieël ut dörp áktiviteite hebbe ángebooje.
Ut Laote viēre is tiejes òs jubileumweekend dur veul meense gedaon, waorvan d’r ok hiēr veul ánwezig zien.
Ònder ánvoering van de kemissie 6x11 hebbe weej mit mekaar en vur mekaar dit fieëst meugelek gemákt.
De veule vreejwilligers ware hierbeej onmisbaar, d’n ieëne stoont òp vreejdág aachter de bar, en dânste en fieëste òp zaoterdág mit de rest van ut publiek mit. D’n ândere genoot òp zòndág en hielp mit áfbraeke op móndág.
Ik bin as dörpsmeens trots op Aostrum en viend ut iendrukwekkend um te zien hoe dit alles verloeëpe is.
Wat ik ok moj voond ien ut jubileumweekend was dat ik meense geziēn heb waorvur ut nie zó vanzellefspraekend was dat ze daor ánwezig ware. Want wor ut fysiek wat lâstiger was, dor was de dráng nor same zien des te grotter.
Ut vastelaoveshart sloēg mit 111 slage per minuut en was nie mér ien bedwang te hâlde.
En dan wardieër ik ut nog mieër dat ze ien en weekend as dit toch efkes zien kòmme kiēke.
Ik hoop dat ik dees meense ok de kòmmende daag nog urges mug begroete.
De waereld stöt ien brând, daenk beejvurbeeld an Oekraïne, Turkije of Syrië.
Ut is goēd um hier ok tiejes de vastelaovend beej stil te staon.
Ok weej hiēr stón stil beej de zwaore gebeurtenisse ien òs aege laeve.
En as weej hierbeej stil staon viend ik ut ok belangriek um stil prebieëre te staon beej de mojje gebeurtenisse ien ut laeve. Want de kòmmende daag zien weej veul same, en durgaons hebbe weej dan ok mieër plezier as verdriēt. Althans, dat gun ik òllie. Want hoe lekker is ut as òw dagelekse zörg gón ovver waor ge òw ut baest kunt verstoppe. Ien de keuke of baeter aachter ut gerdien?
Of as ge vur de “onmeenseleke” keuze stót: Wilde Paw patrol kiēke of liever Superwings?
Ien de dagelekse beslommeringe van òs laeve stoj ik d’r nie zó duk beej stil, mar wat is ut toch fejn um nor mien kiender te kiēke en ze bezig te zien mit al dit sort ònbezörgde keuzes.
En dat ut vur meej aegelek ok hieëlemól gén straf is um den klenste 10x per dág van toffel te motte hale en te zegge dat heej dor nie òp mug klimme via de stoēl.
Mit mien jònges, en en megje op kòmst, mit Anneke en ut laeve dat ik heb priēs ik meejzellef gelukkig en riek.
Weej meuge dan dankbaar zien dat weej hier ònbezörgd, of relatief ònbezörgd, kunne áftrappe vur en paar mojje daag die òs stón te waachte.
D’r is nog en groep meense die ok ânderen Laote viēre. Òs wagebowwers.
Dur mónde vurbereidinge, en láng en hard waerke zörge zeej d’r vur dat weej mit òs kwartet en raod kunne viēre ien de òptochte, en zoeë ok vur de jeugd netuurlek.
Ut publiek ien Rooj en Aostrum ziet dees wages vurbeej kòmme. Ok zeej viēre en geniete dan mit van al ut mojs dat dur de straote trekt.
Gillie wet, d’r is 1 wagebowwer den ik nie ònbenuumd kan laote: Daan Bloemen.
Ik mot ieërlek zegge dat ik Daan persoeënlek nie zó goēd kende.
Net zóas ik de maeste van zien kámmeräöj aegelek ok nie zó goēd ken.
Ik ken Daan gewoeën as enne hieële gezellige kél, den ge host aoveral tege kwámt.
Den âltied wel wat te vertelle haaj en nevve dat ok enne echte Aostrumse jòng was.
De hieële situasie het meej erg ángegrepe. Dat ut laeve maej ònieërlek kan zien, is hier mar beweze. Hoe is ut meugelek dat zó’nne kél dit mot ovverkòmme, en zó wied van huus ok?
Òp ut verkieërde moment òp de verkieërde plek is en uutspraak den ok op ut kartje van Daan stoont en en uutspraak die paest. Of aegelek gewoeën de spieker òp ziene kóp slöt.
Wat as dit… of wat as dat…? Dit zien vraoge die òw ien zó’n situasie bezig kunne bliēve hâlde. Vanzellefspraekend stelde òw die vraog, mar hier kòmde nie uut. Dat geldt ien dit geval, mar ok ien ut algemaen genome. Hoe duk zien weej nie òp de verkieërde plek gewist, mar gewoeën op ut goeje moment. Of ândersum.
Daenk daor âsteblief nie te láng ovver nao, prebieër dit los te laote. Dat mekt ut laeve en stuk räösteger daenk ik.
Ut blieft ònwaerkelek wat ut verlies van Daan kan doēn vur de meense um ‘m hin, vur ut gânse dörp, mar ok vur òs kwartet die mit mekaars vriendegroepe zó dicht beején stón. Ut rákt veul meense nog steeds elken dág.
En tied geleeje spraak ik Lilian.
Zeej vertelde meej: “ik bin en IJsselsteynse. En mit de Piëlhaascup heb ik âltied dubbele win-kânse want ik bin enne Pieëlreus, mar ok enne Karklingel umdat ik hier woeën.
Mar sinds kort vuul ik meej enne echte karklingel, dur wat d’r gebeurd is en wat de meense ien ut dörp vur òs betaekend hebbe”.
Ut geft an hoe de femilie de áfgeloeëpe moejlekke tied belaefd het.
Ut zet iets ovver ut dörp, mar ut zet nog mieër ovver òllie, de femilie en vriende.
Aostrum het diēp respect en òntzettend veul bewoondering vur hoe gillie umgot mit dees verdrietege situasie.
Ien de látste 5 minute ging ut ovver uutrénloeëpende emoties as trots, moēd, geluk en verdriēt.
En as ge now daenkt: goh, wat stöt den daor räösteg zien verhaal te doēn.
Dat is uuterleke schien.
As ik hier stoj kan ik redelek räösteg mien verhaal doēn, mar as vader en dörpsmeens vuul ik meej erg betrokke en duut ut meej veul as ik zie wat d’r hier gebeurd, mar ok wat d’r ien de waereld gebeurd.
D’r zien dan ok de nuuëdege traone gevalle ònder ut schriēve van dit stuk...
De maeste viēle òp ut moment dat ik terug dòcht an de uutvaart van Daan.
D’r wier òs gevraogd um mit te zinge mit ut nummer “Aostrum” van Mirjam Aarts.
Dat hed meej òp dat moment òntzettend gerákt.
Gerákt as meens, gerákt as vader en gerákt as dörpsmeens.
Ut nummer wat SMT (dalek) göt speule geft meej utzellefde gevuul.
Ut gevuul van bliej zien, umdat ik hier woeën.
Ut gevuul dat weej, ien dit mojje dörp, d’r vur mekaar zien op momente dat dat nuuëdeg is.
En waordur weej zegge dat weej òs hier thuus vule.
Dat dörp wor ik woeën is en stuk van mien laeve, dor daelde de vreugde EN… dor daelde de pien.
Vastelaovend same